Hazkundeari eutsi eta urtarrilean gainditu da 12.000 domeinu-izenen langa.

 

Balantze ona eginez eta asmo eta erronka berriekin abiatu du PuntuEUSek urtea. Izan ere, PuntuEUS 2020 plana itxitzat eman eta PuntuEUS 2021 – 2023 plan estrategikoa abiatzea onartu  du PuntuEUS Fundazioaren patronatuak.

 Itxi berri den aldiak oinarriak ezarri eta .EUS domeinua komunitatean zabaltzea zuen helburu. “Ez dago zalantzarik helburuak arrakastaz bete direla. .EUS domeinuak gure gizartean lortu duen onarpena eta presentzia handia da. %242 hazi da domeinua epealdi honetan, domeinu kopurua ia hirukoiztuz eta 4.903 domeinu izatetik 11.927 domeinu izatera pasaz” azaldu du Josu Waliñok, PuntuEUSen zuzendariak. Urtarrilean gainditu da 12.000 domeinu-izenen langa.

 “Esan daiteke, beraz, PuntuEUS Fundazioak 2016-2020 epealdirako landutako plan estrategikoan  aurreikusitako emaitzak gainditu dituela: fundazioaren, domeinuaren eta euskarak ingurune digitalean izan beharreko garapenaren oinarriak ezarri eta  etorkizunerako aukerak zabalduz”, gaineratu du Waliñok.

 Itxi berri den plan estrategikoa abiatzeko hartu zuen Iñaki Goirizelaiak Joan Mari Torrealdairen eskutik lehendakaritzaren lekukoa. Datozen urteetan ere Goirizelaiak jarraituko du lehendakari karguan, UPV/EHUren ordezkari gisa. PuntuEUS Fundazioaren patronatuko gainerako kideak ere mantenduko dira:  Kontseilua, Euskal Idazleen Elkartea, EKE, ESLE, Euskaltel, Euskaltzaindia, EITB eta PuntuEUS Elkartea. 

 Ibilitako bideari jarraiki gizartearen transformazio digitalean euskaratik eragitea izango da PuntuEUSen hurrengo hirurtekorako xedea. Horretarako lau arlo edo erronka nagusitan jarriko dira indarrak: gizarte digital euskalduna, domeinua, industria digitala eta kudeaketa aurreratua.

 Josu Waliño, PuntuEUSen zuzendariaren hitzetan, “gaur egun euskal gizarteak bizi duen egoerari erantzuten dion plana garatu dugu. Gizartearen transformazio digitala bizitzen ari gara, eta, guk, erronka horri euskaratik erantzuten lagunduko dion egitasmoa garatu dugu, gizartearen transformazio digitalean euskara eta .EUS domeinua gako izan daitezen”.

 Datozen urteotan PuntuEUS Fundazioak euskararen estrategia digitalean sakonduko du, industria digitalaren sektorean euskaratik eraginez. .EUS domeinua da horretarako tresna nagusia, eta, helburua .EUS euskararen lurralde digitalean nagusi izatea da. Horretarako, domeinuaren zibersegurtasuna eta kalitate irizpideak areagotuko dira domeinuaren zabalkundea indartuz. Era berean, industria digitalean errotzen, domeinuen nazioarteko sektorean egoten eta eragiten jarraitzea da asmoa.

Ingurune digital globalizatuan euskararen erabilera balioetsiko duen gizartea erdiestea ere erronka handia da. Horregatik, egituratik hasi eta edozein ekimenetan elkarlana eta gardentasuna sustatzen du PuntuEUSek.  Lantalde sendoaren inguruan duen komunitatea askotarikoa da eta izaera hori naturaltasunez onartu eta sustatzen du.